2025-ci il sentyabrın 8-də İranın ev sahibliyi ilə Tehranda Ermənistan Respublikası, İran İslam Respublikası və Hindistan Respublikası xarici işlər nazirliklərinin regional idarələrinin rəhbərləri səviyyəsində üçüncü üçtərəfli görüş keçirilib.
İran nümayəndə heyətinə İran Xarici İşlər Nazirliyinin Cənubi Asiya məsələləri üzrə baş direktoru Məhəmməd Rza Bəhrami, Hindistan nümayəndə heyətinə Hindistan Xarici İşlər Nazirliyinin Pakistan, Əfqanıstan və İran üzrə regional idarəsinin rəhbəri Anand Prakaş, Ermənistan nümayəndə heyətinə isə RATİ Asiya və Sakit okean regionu üzrə departamentinin rəhbəri Anahit Karapetyan başçılıq edib.
Tərəflər üçtərəfli görüşün müntəzəm və illik keçirilməsindən məmnunluq ifadə ediblər.
2023-cü ilin aprelində Yerevanda keçirilmiş birinci iclasda və 2024-cü ilin dekabrında Yeni Dehlidə keçirilmiş ikinci iclasda qəbul edilmiş qərarlar nəticəsində əldə edilmiş irəliləyişlər ümumiləşdirilib.
Tərəflər, həmçinin qarşılıqlı maraqların təmin edilməsi, regionda firavanlığın və rifahın yüksəldilməsi üçün yuxarıda qeyd olunan görüşlərin nəticələrində irəli sürülən məqsədlərin həyata keçirilməsinin vacibliyini vurğulayıblar.
Görüş zamanı tərəflər bu məqsədlə Çabahar limanının strateji yerləşməsindən istifadə edərək, xüsusilə kommunikasiya sahələrində, Şimal-Cənub Beynəlxalq Nəqliyyat Dəhlizi (INSTC), eləcə də Ermənistanın “Sülhün kəsişməsi” layihəsi üzrə əməkdaşlığın genişləndirilməsi və dərinləşdirilməsinin vacibliyini vurğuladılar.
Tərəflər, həmçinin iqtisadi, ticarət, mədəni, xalqlararası əlaqələr və qarşılıqlı maraq doğuran digər sahələrdə əlaqələrin inkişafına yönəlmiş təşəbbüsləri müzakirə edib.
Tərəflərin qarşılıqlı razılığı ilə növbəti üçtərəfli görüşün razılaşdırılmış vaxtda Ermənistanda keçirilməsi qərara alınıb.
